ភ្នំពេញៈ សមត្ថកិច្ចបានសម្រេចចិត្តធ្វើការបំផ្ទុះគ្រាប់បែកកែច្នៃ នោះចោល ដែលត្រូវបានគេផ្លុងចោលនៅមុខរដ្ឋសភាជាតិនៅនឹងកន្លែងតែម្តង ដោយសារតែគ្រាប់បែកនោះមិនអាចយកចេញបានទេ។ យោងតាមអគ្គនាយកមជ្ឈមណ្ឌលកំចាត់មីនស៊ីម៉ាក លោក ហេង រតនា បានប្រាប់ភ្នំពេញប៉ុស្តិ៍ពីកន្លែងកើតហេតុ។
គ្រាប់បែកកែច្នៃ នៅមុខរដ្ឋសភាជាតិនេះត្រូវបានបញ្ជាក់អះអាងថា ជាប្រភេទម្សៅ TNT។
ក្រោយការប្រទះឃើញ គ្រាប់បែកនេះ កងកម្លាំងសមត្ថកិច្ចចម្រុះ ក្រុមប្រឆាំងភារវកម្ម និងមន្ត្រីដោះមីនស៊ីម៉ាក់ បានមកធ្វើការត្រួតពិនិត្យ និងធ្វើការបិទផ្លូវឆ្លងកាត់តំបន់ជុំវិញផ្លូវមកកាន់រដ្ឋសភា និងស្ថានទូតប្រទេសអូស្ត្រាលី។
ក្រោយការពិនិត្យរួចហើយ ឃើញថាមិនអាចយកគ្រាប់បែកនោះចេញបាន អគ្គនាយកមជ្ឈមណ្ឌលកំចាត់មីនស៊ីម៉ាក លោក ហេង រតនា បានប្រាប់ភ្នំពេញ ប៉ុស្តិ៍ថា «យើងនឹងធ្វើការ បំផ្ទុះគ្រាប់នោះនៅហ្នឹងកន្លែង ក្នុងរយៈពេល ៣ នាទីទៀត»។
ក្រោយការបំផ្ទុះដែលបង្ករឲ្យមានផ្សែងខ្មៅក្មួលក្មាញ់មុខរដ្ឋសភា សមត្ថកិច្ចនិងមន្ត្រីស៊ីម៉ាក់ កំពុងនាំគ្នាពិនិត្យមើល។
ដោយឡែក នៅម្តុំស្ពាននាគ ក្បែរវត្តភ្នំ សមត្ថកិច្ចក៏បានប្រទះឃើញគ្រាប់ M79 ចំនួន ៣ គ្រាប់់ចងភ្ជាប់គ្នា បង្កឲ្យមានការភ្ញាក់ផ្អើល នៅព្រឹកថ្ងៃទី១៣ ខែកញ្ញានេះផងដែរ។ ក្រោយប្រទះឃើញ កម្លាំងនគរបាលជំនាញ រាជធានីភ្នំពេញ និងកម្លាំងសមត្ថកិច្ចមូលដ្ឋានបានចុះមកកាន់កន្លែងកើតហេតុភ្លាមៗ រង់ចាំមន្ដ្រីដោះមីនស៊ីម៉ាកមកធ្វើការត្រួតពិនិត្យ។
សូមរង់ចាំអានព័ត៌មានពិស្តារបន្តិចទៀតនេះ
0 comments