សង្ស័យម្សៅ​ មានជាតិផ្ទុះ ដាក់ក្នុងប៊ីដុង ផ្លុងចោល មុខរដ្ឋសភា

ប្រភព៖ដើមអំពិល

ភ្នំពេញ ៖ សេចក្ដីរាយការណ៍ពីអាជ្ញាធរ ខណ្ឌចំការមន បានឱ្យដឹងជំហានដំបូងថា មន្ដ្រីរបស់ខ្លួនបានទទួលព័ត៌មានថា មានប៊ីដុងមួយ ដែលបានផ្លុងចោលនៅជិតវិមានរដ្ឋសភា ដោយនៅក្នុងប៊ីដុងនោះ មានជាតិម្សៅ ដែលគេសង្ស័យថា ម្សៅមានជាតិផ្ទុះ ។ សមត្ថកិច្ចពាក់ព័ន្ធបានធ្វើដំណើរទៅដល់ កន្លែងកើតហេតុនោះហើយ ដើម្បីពិនិត្យស្វែងរកការពិតថា តើម្សៅនោះ ជាប្រភេទម្សៅធម្មតាឬម្សៅមានជាតិផ្ទុះ ។
មន្ដ្រីខណ្ឌចំការមន ដែលនិយាយក្នុង លក្ខខណ្ឌសុំមិនបញ្ចេញឈ្មោះបានប្រាប់មជ្ឈ មណ្ឌលព័ត៌មានដើមអម្ពិលឱ្យដឹងតាមទូរស័ព្ទនៅថ្ងៃសុក្រទី១៣ ខែកញ្ញា នេះថា បុគ្គលិកថែសួន របស់ខណ្ឌចំការមន ត្រូវបានក្មេងរើសអេតចាយម្នាក់ បានទៅរាយការណ៍ប្រាប់ពួកគេថា ក្មេងនោះ បានប្រទះឃើញប៊ីដុងមួយ ដោយនៅក្នុងនោះមានផ្ទុះម្សៅ ប៉ុន្ដែមិនបានប្រាប់ថា ម្សៅយ៉ាងម៉េចទេ ។
ក្រុមអ្នកថែសួន ក៏បានទៅពិនិត្យ ហើយបានឃើញម្សៅដូចក្មេងរើសអេតចាយនោះប្រាប់មែន រួចហើយពួកគេក៏បានរាយការណ៍មកថ្នាក់ខណ្ឌ និងសមត្ថកិច្ចពាក់ព័ន្ធ ។ ឥឡូវនេះ មន្ដ្រីពាក់ព័ន្ធ ក៏ដូចជាកម្លាំងមានសមត្ថកិច្ច បានទៅដល់កន្លែងកើតហេតុ ហើយកំពុងពិនិត្យទៅលើម្សៅនោះ ។
មជ្ឈមណ្ឌលព័ត៌មានដើមអម្ពិល ព្យាយាម ធ្វើសេចក្ដីរាយការណ៍បន្ថែមទៀតនៅពេលក្រោយ ៕