នារីខ្មែរមួយចំនួនបានឲ្យដឹងថា ការធ្លាក់ខ្លួនមកធ្វើការនៅកន្លែងកម្សាន្តនានា ជាពិសេសតាមហាងខារ៉ាអូខេ គឺដោយសារខ្លួនបានបាត់បង់ព្រហ្មចារីទៅលើបុរសៗ។ តើនាងបានបាត់បង់ព្រហ្មចារីដោយរបៀបណា? ហេតុអ្វីគ្រាន់តែបាត់បង់ព្រហ្មចារី សុខចិត្តមកធ្វើការនៅកន្លែងកម្សាន្តទាំងនោះ?
ស្រីលក្ខណ៍ អាយុ២៣ឆ្នាំ ធ្វើការក្នុងហាងខារ៉ាអូខេមួយនៅម្ដុំស្ថានទូតរុស្ស៊ី បានរៀបរាប់ទាំងទឹកមុខស្រងូតស្រងាត់ថា កាលពីមុននាងមិនមែនធ្វើការងារនៅក្នុងខារ៉ាអូខេអីចេះទេ។ ដំបូង គឺនាងធ្វើការនៅរោងចក្រប៉ុណ្ណោះ ក្រោយមកនាងក៏មានសង្សារម្នាក់។
ស្រីលក្ខណ៍ថា៖ “ពេលនោះហើយដែលខ្ញុំជ្រុលជ្រួសអស់ព្រហ្មចារីជាមួយនឹងសង្សាររបស់ ខ្ញុំ។ ស្រលាញ់គ្នាមិនបានប៉ុន្មានផង សង្សារខ្ញុំក៏សុំបែក ព្រោះគេបែកចិត្តស្រលាញ់ស្រីផ្សេង។ ដោយមានការឈឺចាប់ និងខូចចិត្តពេក ខ្ញុំក៏បានសម្រេចចិត្តចូលមកធ្វើការក្នុងខារ៉ាអូខេរហូតមក”។
ចំណែក ស្រីខួច សិស្សនៃសាលាឯកជនមួយក្នុងរាជធានីភ្នំពេញ ដែលកំពុងធ្វើការនៅហាងខារ៉ាអូខេមួយនៅតាមបណ្ដោយផ្លូវទេពផនបាន ប្រាប់ឲ្យដឹងផងថា ការដែលនាងមកធ្វើការនៅក្នុងកន្លែងកម្សាន្តបែបនេះ គឺដោយសារតែនាងចង់រកលុយសម្រាប់ផ្គត់ផ្គងការចាយវាយដោយខ្លួន ឯង ជាពិសេសលើការរៀនសូត្រ។
ស្រីខួចបានបន្ថែមទៀតថា៖ “ម្យ៉ាងទៀត ដោយសារតែខូចចិត្ត ចំពោះសង្សារដែលស្រលាញ់ស្ទើរលេប តែពេលបានខ្លួនបានប្រាណខ្ញុំហើយ បែរជាបោះបង់ខ្ញុំចោល ទើបខ្ញុំបង្ខំចិត្តមកធ្វើការនៅកន្លែងនេះ”។
រីឯ ស្រីម៉ុច មានស្រុកកំណើតនៅខេត្តកោះកុង ដែលជាអ្នកធ្វើការនៅហាងខារ៉ាអូខេមួយកន្លែង ក្នុងខណ្ឌដូនពេញបាននិយាយថា ពីដំបូងឡើយ នាងឡើងមករៀនជំនាញអ៊ុតសក់ និងផាត់មុខនៅភ្នំពេញ។ មិនដល់មួយឆ្នាំផង នាងក៏បានស្រលាញ់គ្នាជាមួយបុរសម្នាក់ អាយុប្រហែល៣០ប្លាយ។
ស្រីម៉ុចថា៖ “ពេលនោះហើយ គឺជាពេលដែលខ្ញុំបានប្រគល់អ្វីៗគ្រប់យ៉ាងជូនគាត់។ ក្រោយមកទៀតទើបខ្ញុំដឹងថា គាត់មានប្រពន្ធ និងកូនរួចទៅហើយ។ ដោយសារតែមានការខកចិត្ត និងសោកស្ដាយពេក ចាប់ពីពេលនោះមក ខ្ញុំក៏ផ្ដាច់ទំនាក់ទំនងជាមួយគាត់ ហើយក៏សម្រេចចិត្តប្ដូរមកធ្វើការជានារីខារ៉ាអូខេរហូតមក”។
អនុប្រធានសហព័ន្ធសហជីពកម្មករ ចំណីអាហារ និងសេវាកម្មកម្ពុជា អ្នកស្រី អ៊ូ ទេពផល្លីន ដែលតែងតែធ្វើការជិតស្និតជាមួយនឹងនារីៗធ្វើការកន្លែងកម្សាន្ត បានពន្យល់ឲ្យដឹងថា៖ “មូលហេតុចម្បងដែលជាបញ្ហាប្រឈមចំពោះនារីធ្វើការកន្លែងកម្សាន្ត ហើយឈានដល់ការរួមភេទ អាចបណ្ដាលមកពីកត្តា ជីវភាពគ្រួសារទីទាល់ក្រ ចាញ់បោកសង្សារ ខ្វះចំណេះដឹង គ្មានជំនាញ និងខ្វះដើមទុនជាដើម ដូច្នោះហើយជម្រើសចុងក្រោយរបស់ពួកគាត់ មានតែសម្រេចចិត្តចូលធ្វើការកន្លែងកម្សាន្តតែប៉ុណ្ណោះ ទោះបីជាដឹងថា វាជាការងារដែលមិនសូវថ្លៃថ្នូរក៏ដោយ”។
អនុប្រធានដដែលបានបន្ថែមឲ្យដឹងទៀតថា តាមរយៈការសង្កេតរបស់គាត់ឃើញថា នារីដែលធ្វើការកន្លែងកម្សាន្ត អាចប្រឈមនឹងបញ្ហាមួយ ចំនួនដូចជា អំពើហិង្សា ការបៀតបៀនផ្លូវភេទ និងការប្រើប្រាស់គ្រឿងស្រវឹងជាដើម។ អ្នកស្រីក៏សំណូមពរដល់បុរសៗដែលចូលចិត្តស្វែងរកសេវាកម្សាន្តថា មេត្តាយោគយល់ អធ្យាស្រ័យ និងគោរពដល់សិទ្ធិបុគ្គលរបស់ពួកគាត់ផង ទោះបីជាពួកគាត់ធ្វើការងារប្រភេទនេះក៏ដោយ”៕
0 comments