ភ្នំពេញៈ ដោយ
ក្តីអាណិតស្រឡាញ់ចំពោះប្រជាជន ក៏ដូចជាកុមារកម្ពុជា ធនាគារគូកមីន
(Kookmin Bank)
រួមជាមួយនឹងអង្គភាពសេវាត្រួតពិនិត្យហិរញ្ញវត្ថុកូរ៉េ (Financial
Supervisory Service) និងអង្គការសាលវេស៊ិននៃសាធារណរដ្ឋកូរ៉េ
បានរួមគ្នាជួយឧបត្ថម្ភដល់កុមារកម្ពុជាមានជំងឺបេះដូងប្រហោង
តាំងពីកំណើតចំនួន១០នាក់
ឲ្យពួកគេបានទៅទទួលការវះកាត់និងព្យាបាលនៅមន្ទីរពេទ្យ Sejong
ប្រទេសកូរ៉េ។
លោក Lee Kun Ho នាយកប្រតិបត្តិ នៃធនាគារគូកមីន បានឲ្យដឹងថា កម្មវិធីដែលមានឈ្មោះថា «ឧបត្ថម្ភកុមារកម្ពុជាដែលមានជំងឺបេះដូងប្រហោងពីកំណើត»គឺជា កម្មវិធីមួយនៃកម្មវិធីរួមចំណែកទទួលខុសត្រូវផ្នែកសង្គមជាសកល ( Global Corporate Social Responsibility) របស់ធនាគារគូកមីន។ កម្មវិធីនេះ មានសារ:សំខាន់ណាស់ ដោយសារនោះជាកម្មវិធីដែលមានការចូលរួមជាមួយអង្គភាពសេវាហិរញ្ញវត្ថុ ត្រួតពិនិត្យហិរញ្ញវត្ថុ ដែលជាអង្គភាពគ្រប់គ្រងនិងត្រួតពិនិត្យលើប្រព័ន្ធហិរញ្ញវត្ថុរបស់ ប្រទេសកូរ៉េទាំងមូល ដើម្បីជួយដល់កុមារក្រីក្ររបស់កម្ពុជា។
លោក Lee Kun Ho មានប្រសាសន៍ថា៖«ក្នុងឆ្នាំ២០១៣នេះ កម្មវិធីឧបត្ថម្ភរបស់ធនាគារគូកមីន បានជួយឧបត្ថម្ភកុមារកម្ពុជាចំនួនដប់នាក់ ដែលមានជំងឺបេះដូងប្រហោងពីកំណើត មកធ្វើការវះកាត់នៅប្រទេសកូរ៉េ ហើយកុមារទាំងដប់នាក់បានទទួលការវះកាត់ដោយជោគជ័យ និងជាសះស្បើយបានយ៉ាងឆាប់រហ័សថែមទៀតផង»។ លោកបន្តថា៖«កាលពីឆ្នាំ២០១២ ធនាគារគូកមីន បានជួយឧបត្ថម្ភកុមារកម្ពុជា ចំនួនបីនាក់ ដែលមានជំងឺបេះដូងពីកំណើតនេះដែរ ហើយឆ្នាំនេះយើងបានបង្កើនការឧបត្ថម្ភរហូតដល់ចំនួន១០នាក់»។
អ្នកនាង មឿង លក្ខិណា ប្រធានធនធានមនុស្ស និងគម្រោងនៅធនាគារគូកមីន បានឲ្យដឹងថា កុមារកម្ពុជាទាំងដប់រូបដែលទទួលការឧបត្ថម្ភរបស់ធនាគារគូកមីននេះ មានប្រុស៣នាក់ និងស្រី៧នាក់ ហើយពួកគេមកពីភ្នំពេញ កណ្តាល តាកែវ កំពង់ឆ្នាំង និងកំពង់ចាម។ អ្នកនាងបញ្ជាក់ថា ក្មេងទាំង១០រូបនោះមានវ័យចន្លោះពី៧ខែរហូតដល់១៦ឆ្នាំហើយពួកគេ សុទ្ធតែជាកុមារក្រីក្រ ដែលឪពុកម្តាយគ្មានលទ្ធភាពព្យាបាល ក្រោយអង្គការរបស់កូរ៉េ និងមន្ទីរកូរ៉េនៅកម្ពុជារកឃើញថា ពួកគេពិតជាក្រីក្រ ហើយត្រូវការសង្គ្រោះបន្ទាន់នោះ។
កុមារី សួន ស្រីនីត អាយុ១២ឆ្នាំ ដែលជាកុមារមានជំងឺម្នាក់ ក្នុងចំណោមពួកគេទាំងដប់នាក់ ទើបតែរៀនត្រឹមថ្នាក់ទីមួយនៅបឋមសិក្សា ថ្វីបើនាងមានអាយុ១២ឆ្នាំហើយក៏ដោយ។ ដោយសារបងប្រុសនិងបងស្រីនាង បោះបង់ការសិក្សានិងបានទៅធ្វើការនៅរោងចក្រ ទើបនាង និង ប្អូនរបស់នាងមានលទ្ធភាពបានទៅសិក្សានៅសាលាបឋមសិក្សានៅឆ្នាំនេះ ។ កាលពីពីរឆ្នាំមុន នាងមាន ជំងឺគ្រុនឈាម និងត្រូវបានឪពុកម្តាយយកទៅព្យាបាលនៅមន្ទីរពេទ្យ គ្រូពេទ្យក៏បានរកឃើញដោយចៃដន្យពីជំងឺបេះដូងពីកំណើតរបស់នាង។ នាងបានឈឺរ៉ាំរ៉ៃពីរោគសញ្ញានៃជំងឺបេះដូងនេះ តាំងពីកំណើត ប៉ុន្តែ ឪពុកម្តាយរបស់នាង គ្មានលទ្ធភាពយកនាងទៅព្យាបាលនៅមន្ទីរពេទ្យ។ ជាភ័ព្វសំណាង កុមារីនេះ បានទទួលការឧបត្ថម្ភ ពីធនាគារគូកមីន ដើម្បីយកនាងទៅវះកាត់ និងព្យាបាលនៅមន្ទីរពេទ្យSejongប្រទេសកូរ៉េ ។
អ្នកនាងលក្ខិណាបញ្ជាក់ថា៖«ក្រោយពេលចេញទៅព្យាបាលកាលពីថ្ងៃទី ២៦ ខែកក្កដា នៅពេលនេះ ពួកគេបានជាសះស្បើយហើយ ហើយពួកគេនឹងវិលមកកម្ពុជាវិញនៅថ្ងៃទី១៥ សីហា នេះ»។
ពាក់ព័ន្ធនឹងគម្រោងជួយកុមារកម្ពុជានេះ លោក Lee Kun Ho បានបញ្ជាក់ថា៖«ចំពោះកម្មវិធីជួយឧបត្ថម្ភកុមារកម្ពុជា ដែលមានជំងឺបេះដូងពីកំណើតនេះ ធនាគារគូកមីន មានការប្តេជ្ញាចិត្តខ្ពស់ក្នុងការជួយឧបត្ថម្ភកុមារកម្ពុជា រយ:ពេលវែង មានន័យថា ធនាគារនឹងបន្តជួយកុមារកម្ពុជានៅឆ្នាំក្រោយៗទៀត»។ លោកបន្តថា៖«ក្រៅពីនេះ កន្លងមក ធនាគារគូកមីនក៏បានជួយឧបត្ថម្ភផ្តល់អាហារថ្ងៃត្រង់ ដល់កុមារក្រីក្រកម្ពុជាដែលរៀននៅបឋមសិក្សា តាមរយ:អង្គការស្បៀងអាហារពិភពលោកពីឆ្នាំ២០០៩ផងដែរ ហើយក៏ធ្លាប់ជួយសង់ផ្ទះដល់ប្រជាជនក្រីក្រនៅសៀមរាប និងគម្រោងមួយចំនួនទៀតនៅខេត្តកំពត»។
បច្ចុប្បន្ន ធនាគារគូកមីនកម្ពុជា ដែលជាបុត្រសម្ព័ន្ធរបស់ធនាគារគូកមីននៅប្រទេសកូរ៉េមានគម្រោងបើក សាខាធនាគារគូកមីនដែលមានទីតាំងនៅទួលគោកនៅដើមខែវិច្ឆិកាខាងមុន នេះ ។ ធនាគារ គូកមីនកម្ពុជា នឹងបម្រើសេវាហិរញ្ញវត្ថុ ដែលមានគុណភាពខ្ពស់ ជូនអតិថិជន នៅប្រទេសកម្ពុជា។ ធនាគារគូកមីន នឹងបន្តឧបត្ថម្ភកុមារនៅទូទាំងបណ្តាប្រទេសនៅតំបន់អាស៊ី ហើយធនាគារបុត្រសម្ព័ន្ធរបស់គូកមីននៅកូរ៉េនេះ នឹងដើរតួនាទីដ៏សំខាន់ ក្នុងការភ្ជាប់ទំនាក់ទំនងជាមួយសហគមន៍នៅប្រទេសកម្ពុជា៕
ប្រភពពី ភ្នំពេញ ប៉ុស្តិ៍
0 comments